Հանրապետության ոստիկանության (նախկինում ՆԳՆ) Վետերանների խորհուրդը ստեղծվել է ՀԽՍՀ ՆԳ նախարարի 1970 թվականի օգոստոսի 31-ի թիվ 424 հրամանով, ԽՍՀՄ Ներքին գործերի նախարարության 1969թ. դեկտերմների 30-ի թիվ 449 հրամանով հաստատված կանոնադրության 3-րդ կետի համաձայն, իսկ 4-րդ կետի պահանջներին համապատասխան խորհրդի անդամ են ընդունվել 53 վետերան: Վետերանների խորհրդի առաջին նախագահ է ընտրվել 3-րդ դասի կոմիսար (համապատասխանում է ոստիկանության գեներալ-մայոր կոչմանը) Գուրգեն Մելիքի Ակոպովը, որը նախագահել է մինչև 1981 թվականը:
Հետագա տարիներին Վետերանների խորհրդի նախագահ են ընտրվել Էդվարդ Ալեքսանի Մնացականյանը (1981-2000թթ.), Ռոմա Ալեքսանդրի Բաբայանը (2000-2008թթ.), Դավիթ Աշոտի Մովսեսյանը (2009-2011թթ.): 2012թ. փետրվարից Վետերանների խորհրդի նախագահն է Գրիգորի Կոնստանտինի Աբովյանը:
1987թ. մարտի 5-ին տեղի ունեցած Զինված ուժերի, Հայրենական մեծ պատերազմի, աշխատանքի և իրավապահ մարմինների հանրապետական վետերանների հիմնադիր համագումարի ժամանակ խորհրդի կազմում է ընդգրկվել նաև ՆԳՆ Վետերանների խորհուդը: ՀՀ ոստիկանության Վետերանների խորհրդի 2003 թ. օգոստոսի 6-ի հերթական համաժողովի ժամանակ որոշում է կայացվել դուրս գալ հանրապետական խորհրդի կազմից և ստեղծել Հանրապետության ոստիկանության վետերանների ինքնուրույն կազմակերպություն: Համաժողովի ընթացքում հաստատվել է նաև կազմակերպության կանոնադրությունը, իսկ նույն թվականի օգոստոսի 29-ին հասարակական կազմակրեպությունը ՀՀ արդարադատության նախարարությունում գրանցվել է որպես «Հանրապետության ոստիկանության Վետերանների խորհուրդ»:
2007 թվականից Վետերանների խորհրդի նախագահը, միաժամանակ հանդիսանում է նաև ՀՀ ոստիկանության պետի խորհրդականը:
2008թ. Վետերանների խորհրդի միջնորդությամբ Երևան քաղաքի և հանրապետության մարզերի ոստիկանության վարչություններում ստեղծվեցին վարչության պետերի օգնականների պաշտոններ, որոնք օժտվեցին տարածքային վետերանական կազմակերպությունների ղեկավարների պարտականություններով, իսկ 2015թ. փետրվարից ոստիկանության Երևան քաղաքի վարչության պետի օգնականի պաշտոններ ստացան նաև քաղաքի ութ վարչական շրջանների Վետերանների խորհրդի նախագահները:
Որոշվեցին նաև Վետերանների խորհրդի և ոստիկանության ստորաբաժանումների միջև համագործակցության կարգը, երիտասարդ աշխատակիցների և ոստիկանության ուսումնական հաստատությունների ունկնդիրների շրջանում բարոյահոգեբանական և հայրենասիրական դաստիարակության ձևերը, ինչպես նաև ոստիկանության հեղինակության և բնակչության շրջանում վստահության բարձրացմանը, իրավախախումների կանխարգելմանը և հանցավորության դեմ պայքարին ուղղված միջոցառումները:
2019թ. հունվարի դրությամբ կազմակերպությունում հաշվառման են վերցված 8760 մարդ, այդ թվում`
- նախկին աշխատակիցների ընտանիքների անդամներ, որոնք կորցրել են կերակրողին,
- Հայրենական մեծ պատերազմի, մարտական գործողությունների, այդ թվում նաև այլ երկրներում, ինչպես նաև պետական սահմանների պաշտպանության մասնակիցներ, վետերան-հաշմանդամներ և այլն,
- ՀՀ ոստիկանության վետերան-թոշակառուներ` 8500 մարդ, որոնց ընդհանուր թիվը, ըստ մարզերի, բաշխված է հետևյալ կերպ`
1. Արագածոտնի մարզ - 466
2. Արարատի մարզ - 620
3. Արմավիրի մարզ - 572
4. Գեղարքունիքի մարզ - 427
5. Լոռու մարզ - 545
6. Կոտայքի մարզ - 973
7. Շիրակի մարզ - 616
8. Սյունիքի մարզ - 228
9. Վայոց Ձորի մարզ - 164
10. Տավուշի մարզ - 249
11. Երևան քաղաք - 3640
Կազմակերպության բարձրագույն ղեկավար մարմինը համարվում է համաժողովը, որը գումարվում է հինգ տարին մեկ անգամ:
Համաժողովների միջև ընկած ժամանակահատվածում կազմակերպության գործունեությունը կազմակերպում է Վետերանների խորհուրդի նախագահությունը, որը ղեկավարում է համաժողովի կողմից հինգ տարի ժամկետով ընտրված Վետերանների խորհրդի նախագահը:
Ոստիկանության վետերանների խորհուրդի նախագահությունը բաղկացած է 13, իսկ վերահսկիչ հանձնաժողովը` 3 անդամներից:
Կազմակերպության հիմնական նպատակներն են`
1. Մասնակցությունը թոշակառուների, վետերանների, նրանց ընտանիքների անդամների, ինչպես նաև ոստիկանության զոհված աշխատակիցների ընտանիքների առջև ծառացած ֆինանսական և սոցիալական խնդիրների լուծմանը, բժշկական և բարոյական աջակցությանը, իրավունքների և օրինական շահերի պաշտպանմանը:
2. Օժանդակություն ոստիկանությանը իրավակարգի պահպանման խնդիրների լուծման և երիտասարդ աշխատակիցների դաստիարակության ուղղությամբ:
3. Կազմակերպության առջև դրված նպատակների կատարման ուղղությամբ սերտ համագործակցումը ՀՀ ոստիկանության բոլոր աշխատակիցների, պատերազմի և աշխատանքի վետերանական կազմակերպությունների, պետական և հասարակական այլ կառույցների հետ:
Կազմակերպությունն իր առջև դրված խնդիրներին հասնելու համար, կանոնադրության և գործող օրենսդրության համաձայն, լուծում է հետևյալ խնդիրները.
1. Նպաստում է հասարակական կարգի պահպանմանը և ոստիկանության վետերանների ակտիվ մասնակցությանը հանցավորության դեմ պայքարում:
2. Օգտագործելով զանգվածային լրատվական միջոցները` հոգ է տանում ոստիկանության հեղինակության բարձրացման ուղղությամբ և նրա գործունեության շուրջ հասարակական դրական կարծիքի ձևավորմանը:
3. Ոստիկանության աշխատակիցների դաստիարակության նպատակով մասնակցում է օրինականության և ծառայողական էթիկայի նորմերի անվերապահորեն պահպանմանն ուղղված գործընթացին:
4. Մասնակցում է երիտասարդության ռազմա-հայրենասիրական, բարոյական, կուլտուրական դաստիարակության աշխատանքներին, վետերանների առողջության ամրապնդման, ինչպես նաև զոհված ոստիկանների հիշատակի հավերժացմանն ուղղված գործունեությանը:
5. Մասնակցում է գործող օրենսդրության կատարելագործման ուղղությամբ առաջարկությունների մշակմանը:
6. Միջոցներ է ձեռնարկում կազմակերպության անդամների և նրանց ընտնիքների սոցիալական և իրավական խնդիրների լուծման, ինչպես նաև պետության օրենսդիր և գործադիր մարմիններում նրանց ներկայացնելու ուղղությամբ:
7. Մասնակցում է կարիքավոր վետերանների, հաշմանդամների, թոշակառուների և նրանց ընտանիքների անդամների, ինչպես նաև ծառայական պարտականությունները կատարելիս զոհված աշխատակիցների ընտանիքների անդամների բարեգործական, սոցիալական աջակցության, բնակարանային պայմանների, բժշկական, նյութական և այլնի բարելավման աշխատանքների կյանքի կոչմանը:
8. Կազմակերպում է կապերը հասարակական այլ կազմակերպությւոնների հետ, ուսումնասիրում նրանց փորձը: