ՈԶ հատուկ նշանակության գումարտակի մարտավարամասնագիտական զորավարժություն /ՏԵՍԱՆՅՈՒԹ, ԼՈՒՍԱՆԿԱՐՆԵՐ/

Դեկտեմբերի 3-ին տեղի ունեցավ Ոստիկանության զորքերի հատուկ նշանակության գումարտակի մարտավարամասնագիտական զորավարժություն, որին ներկա էին ոստիկանության պետի պաշտոնակատար Արման Սարգսյանն ու ոստիկանության զորքերի հրամանատար Վահե Ղազարյանը։
Մինչ զորավարժության մեկնարկը Ոստիկանության զորքերի ծառայողները ներկայացրին ստորաբաժանումների սպառազինությունն ու տեխնիկան։
Զորավարժությունն անցկացվեց մի քանի փուլով։
Ըստ սցենարի՝ ահաբեկչական խմբավորումը ոչնչացնում է զինված պահակախմբին և գրավում հատուկ պահպանվող օբյեկտը։ Ոստիկանության զորքերի հատուկ նշանակության գումարտակի անձնակազմը խմբավորմանը վնասազերծելու և ոչնչացնելու նպատակով բաժանվում է 3 խմբի՝ շրջափակման, պատսպարման և գրոհային։ Շենքը շրջափակվում է։ Իրականացվում են ականապատման աշխատանքներ։ Հրամանը հնչելուն պես ոստիկանները գրոհում են, դիպուկահարները ոչնչացնում են շինության մուտքերի ու պատուհանների մոտ գտնվող զինված ահաբեկիչներին։
Ահաբեկչական խմբավորման երեք անդամներին հաջողվում է փախչել․ նրանք մտնում են հարակից բնակելի շենք և պատանդ վերցնում երկու քաղաքացու։ Շենքը շրջափակվում է։ Ոստիկանությունը որոշում է խումբ ուղարկել բանակցությունների համար։
Ահաբեկիչները պահանջում են ավտոբուս՝ օդանավակայան մեկնելու համար։ Մեքենան տրամադրվում է։
Ավտոբուսի շարժվելուց հետո սկսվում է դրա գրավման և ահաբեկիչների վնասազերծման օպերացիան։
Ահաբեկիչները վնասազերծվում են, պատանդներն՝ ազատ արձակվում։
Զորավարժության երկրորդ փուլում ցուցադրվեցին շինություն ներթափանցելու գործողություններ։
Երրորդ փուլում ցուցադրվեցին ոստիկանության զորքերի գործողությունները զանգվածային անկարգությունների ժամանակ։
Չորորդ փուլում ոստիկանության զորքերի ծառայողները ցուցադրեցին ինքնաձիգով, ատրճանակով և դանակով ձեռնամարտի հնարքներ։
Զորավարժության ավարտին Ոստիկանության զորքերի ծառայողներին դիմեց ոստիկանության պետի պաշտոնակատար Արման Սարգսյանը։