Ոստիկանների ուղեկցությամբ անչափահասները զորամաս են այցելել /ՏԵՍԱՆՅՈՒԹ/

Ոստիկանությունն անչափահասների իրավախախտումների կանխարգելման, նրանց անվտանգության ապահովման և դաստիարակության նպատակով, հաճախ է տարաբնույթ միջոցառումներ նախաձեռնում:
Հերթական միջոցառումը կազմակերպվեց դեկտեմբերի 7-ին: Ոստիկանության ՔՀԳ վարչության 3-րդ` անչափահասների գործերով և ընտանիքում բռնության կանխարգելման վարչության նախաձեռնությամբ Հանրապետական թիվ 1 հատուկ կրթահամալիրի սաները այցելեցին ՀՀ ՊՆ զորամաս:
Այցի նպատակն էր անչափահասների մեջ արժևորել պետության, հայրենիքի և բանակի պատկերացումները, նաև սերմանել հայոց բանակի զինվոր լինելու գաղափարը:
Ոստիկանների ուղեկցությամբ անչափահասները եղան զորանոցում, ծանոթացան զինվորների առօրյային, մտերմացան նրանց հետ, Աստվածաշունչ նվիրեցին ու լուսանկարվեցին: Պարզեցին, թե ծառայողները որտեղ են մարտավարամասնագիտական պարապմունքներ անցկացնում: Սովորեցին ինչպես է պետք կրել զրահաբաճկոն, սաղավարտ ու զենք, ինչպես օգտվել ռադիոկապի միջոցներից, ինչպես հակագազ հագնել:
Անչափահասների անականկալ այցին ի պատասխան, զինվորներն էլ իրենց անակնկալն ունեին. երգ` կիթառի նվագակցությամբ:
Կրթահամալիրի սաները շրջեցին զորմասում տեսան, թե որտեղ են անցկացնում զինվորները ֆիզիկական պատրաստականության պարապմունքերը, իսկ հանդիպման ավարտին զինվորական ճաշարանում ճաշեցին նրանց հետ:
Մեկ օրը զորմասում` մի ուրույն հայրենասիրական դաս էր, որն անցավ ճանաչողական ու ջերմ մթնոլորտում: