Հանրապետության ուսումնական հաստատություններն այսօր կրկին լցվեցին աշխույժով (ՏԵՍԱՆՅՈՒԹ և ԼՈՒՍԱՆԿԱՐՆԵՐ)

Ուսումնական տարվա առաջին օրն առանձնահատուկ իրողություն է, եւ դրան նախապատրաստվել են ոչ միայն դպրոցները, այլեւ ոստիկանությունը:
Վաղ առավոտից դպրոցների մոտ ծառայություն իրականացնող ոստիկանները կարգավորում էին երեխաների ու նրանց ծնողների տեղաշարժը, թույլ չէին տալիս, որ մարդկանց ու մեքենաների կուտակումներ առաջանան, օգնում էին, որ երեխաներն անվտանգ հատեն դպրոցամերձ բանուկ ճանապարհահատվածը:
Ոստիկանության պետ, գեներալ-լեյտենանտ Վլադիմիր Գասպարյանի կարգադրությամբ՝ այս տարի եւս ոստիկանությունն անվտանգության միամսյակ է հայտարարել, որի ընթացքում ոստիկանական կարգախմբերը կպարեկեն դպրոցների եւ ուսումնական մյուս հաստատությունների մոտ: Ճանապարհային ոստիկանության, համայնքային ոստիկանության, պարեկապահակետային հատուկ գումարտակի ծառայողները, անչափահասների գործերով տեսուչները ուժեղացված ծառայությամբ կապահովեն երեխաների անվտանգությունը:
Երեխայի անվտանգությունը պետք է ապահովել մի՛շտ՝ համարելով դա բոլորիս գերխնդիրը. սա սկզբունք է ոստիկանության համար:
Եվ այսպես. գիտելիքի նոր տարին սկսված է:
Շնորհավորում ենք Գիտելիքի օրվա առթիվ:
Բարի ճանապարհ...