Շենգավիթի ոստիկանները հայտնաբերել են խուլիգանություն կատարած անձանց

Սեպտեմբերի 13-ին, ժամը 01.45-ին, ոստիկանության Շենգավիթի բաժնում խուլիգանության վերաբերյալ հաղորդում էր ստացվել։ Մեկնած օպերատիվ խումբ պարզել է, որ ժամը 01.20-ին Բագրատունյաց փողոցում արծաթափայլ «Օպել Աստրա» ավտոմեքենայի վարորդը փակել է «ՎԱԶ-21099» ավտոմեքենայի ճանապարհը։ Օպելի վարորդն ու նրան ուղեկցող անձանցից մեկը փայտե մահակով ու ոտքով սկսել են հարվածել «ՎԱԶ-21099»-ի բնեռնախցիկին և դռանը, իսկ երրորդը՝ անհարգալից վերաբերմունք դրսևորելով հասարակության նակատմամբ, կոպիտ կերպով խախտելով հասարակական կարգը կրակել է ավտոմեքենայի ուղղությամբ: Տուժողից ընդունվել է հաղորդում: Շենգավիթի քրեական հետախույզների, համայնքային ոստիկանների և ոստիկանության Երևան քաղաքի վարչության ՊՊԾ գնդի 5-րդ վաշտի ծառայողների ձեռնարկած միջոցառումների շնորհիվ պարզվել է խուլիգանությունը կատարողների ինքնությունը: Բացատրական աշխատանքների շնորհիվ, ժամը 16.25-ին նրանք ներկայացել են ոստիկանության Շենգավիթի բաժին և տվել խոստովանական բացատրություն։ Ներկայացրել են նաև «Մակարով» տիպի, 4.5 մմ տրամաչափի օդաճնշիչ ատրճանակը: Նշանակվել է փորձաքննություն: Նախապատրաստվում են նյութեր: