«Կիբերհանցավորության դեմ պայքար» թեմայով սեմինար՝ ոստիկանության կրթահամալիրում (ՏԵՍԱՆՅՈՒԹ)

2014 թվականին Հայաստանի Հանրապետության հետ ստորագրված Արևելյան գործընկերության ոստիկանական համագործակցության եռամյա գործողությունների ծրագրի շրջանակներում՝ նոյեմբերի 29-ից ոստիկանության կրթահամալիրում իր աշխատանքն սկսեց «Կիբերհանցավորության դեմ պայքար» թեմայով սեմինարը, որն անցկացնելու նպատակով Երևան էին ժամանել Լեհաստանի Հանրապետության ներքին գործերի նախարարության համապատասխան ստորաբաժանման փորձագետները:
Ոստիկանության կրթահամալիրի պետի տեղակալ, ոստիկանության գնդապետ Տիգրան Եսայանը ողջունելով միջոցառման մասնակիցներին՝ կարևորեց եվրոպական երկրների հետ ոստիկանական սերտ փոխհամագործակցությունն ու հույս հայտնեց, որ դասընթացի ընթացքում ձեռք բերված գիտելիքները կլինեն արդյունավետ և կիրառելի ամենօրյա աշխատանքում:
Նման դասընթացների կազմակերպումը հատկապես կարևոր են ոստիկանության ծառայողներին կիբերհանցավորության դեմ պայքարում միջազգային լավագույն փորձի օգտագործմամբ մասնագիտական պատրաստականության կատարելագործման համար:
Ոստիկանության շտաբի միջազգային ոստիկանական համագործակցության բաժնի պետի տեղակալ, ոստիկանության մայոր Նորայր Աբգարյանը ներկայացրեց Եվրոպական հանձնաժողովի կողմից նախաձեռնված Արևելյան գործընկերության ոստիկանական համագործակցության գործողությունների ծրագիրը, որը նախատեսված է 2015-2017 թվականների համար:
Ծրագրի նպատակն է աջակցել Եվրոպական Միության և Արևելյան գործընկերության երկրների միջև ոստիկանական համագործակցության զարգացմանը հատկապես անդրազգային հանցավորության դեմ պայքարում: