Խոսքը գործի վերածվեց. «Հետիոտնի և ուղևորի պարտականությունները» թեմայով դասընթացներ անցկացվեցին Երևանի 51 դպրոցներում (ՏԵՍԱՆՅՈՒԹ և ԼՈՒՍԱՆԿԱՐՆԵՐ)

Վերջերս մի շարք հասարակական կազմակերպություններ և քաղաքացիներ արձագանքելով ճանապարհային ոստիկանության կոչին՝ պատրաստակամություն էին հայտնել դպրոցներում ու հանրակրթական հաստատություններում կազմակերպել ճանապարհային երթևեկության կանոնների ուսուցման դասընթացներ: Շահագրգիռ կողմերի՝ ճանապարհային ոստիկանության, ոստիկանության Երևան քաղաքի վարչության անչափահասների գործերով բաժանմունքների, հասարակական կազմակերպությունների ներկայացուցիչների, ինչպես և համացանցի ակտիվ օգտատերերի ու լրագրողների առաջին հանդիպումը կայացել էր ապրիլի 5-ին: Օրվա թեման անչափահասների ճանապարհային երթևեկության անվտանգությունն Էր։
ճանապարհային ոստիկանության պետ Եգոր Կարապետյանը շնորհակալություն հայտնելով «Հետիոտնի և ուղևորի հիմնական պարտականությունները» խորագրով հանդիպում-զրույցի մասնակիցներին՝ նշել էր, որ ոստիկանությունը պատրաստ Է քննարկել համատեղ միջոցառումների ցանկացած նախագիծ և կյանքի կոչել հետաքրքիր առաջարկներն ու մտահղացումները։
Թեմայի շրջանակներում կայացած ակտիվ քննարկումներից հետո ճանապարհային ոստիկանության կողմից առաջարկություն էր եղել մայիսի 11-ին այցելել դպրոցներ և անցկացնել «Հետիոտնի և ուղևորի պարտականությունները» թեմայով դասընթացներ:
Ոստիկանների հետ դպրոց մեկնելու պատրաստակամություն էին հայտնել նաև խնդրով մտահոգ հասարակական կազմակերպությունների ներկայացուցիչներ և քաղաքացիներ։
Եվ ահա խոսքը գործի վերածվեց:
Մայիսի 11-ին մայրաքաղաքի 51 դպրոցներում հյուրընկալվել էին Ճանապարհային ոստիկանության, ոստիկանության Երևան քաղաքի վարչության անչափահասների գործերով բաժնի և ենթակա ստորաբաժանումների ծառայողներ, հասարակական կազմակերպությունների ներկայացուցիչներ, քաղաքացիներ, ինչպես նաև կամավորներ:
«Հետիոտնի և ուղևորի պարտականությունները» թեմայով դասընթացների ընթացքում հարցուպատասխանի միջոցով դպրոցահասակ երեխաներին ներկայացվեցին իրենց անմիջական անվտանգությանը վերաբերող հիմնական կանոնները: Որոշ դպրոցների Ճանապարհային ոստիկանության կողմից տրամադրվեց նաև երթևեկության կանոնների ուսուցման համար համապատասխան գրականություն:
Ամփոփելով դասընթացների արդյունքները՝ ճանապարհային ոստիկանության պետ Եգոր Կարապետյանը նշել է, որ միջոցառումն անցել է բարձր արդյունավետությամբ և ակնկալվում է, որ մոտ ապագայում նույն կերպ կձեռնարկվեն համատեղ միջոցառումներ Ճանապարհային երթևեկության անվտանգության ապահովման ոլորտում առկա շատ ու շատ խնդիրներ լուծելու համար: