ՀՀ-ում Ավստրալիայի Դաշնային ոստիկանության կապի ավագ սպան ՀՀ ոստիկանությունում (ՏԵՍԱՆՅՈՒԹ)

Հուլիսի 9-ին ոստիկանության շտաբի պետ, ոստիկանության գեներալ-մայոր Արամ Զաքարյանն ընդունեց Հայաստանի Հանրապետությունում Ավստրալիայի Դաշնային ոստիկանության կապի ավագ սպա Մարկո Դոկմանովիչին /նստավայրը՝ Բեյրութ/:
Ողջունելով հյուրին՝ Արամ Զաքարյանը կարևորեց անդրազգային հանցավորության դեմ տարվող պայքարում երկու երկրների ոստիկանական կառույցների միջև համագործակցությունը որակական նոր մակարդակի բարձրացնելու անհրաժեշտությունը, ինչի նպատակով առաջարկվեց իրավական հիմքեր ստեղծել Հայաստանի Հանրապետության ոստիկանության և Ավստրալիայի Դաշնային ոստիկանության հետագա փոխհամագործակցության համար:
Հանդիպման ընթացքում քննարկվեցին մի շարք հարցեր, մասնավորապես՝ անդրազգային կազմակերպված հանցավորության, մարդկանց թրաֆիքինգի, անօրինական միգրացիայի դեմ պայքարի վերաբերյալ: Նաև տեղեկատվություն փոխանակվեց երկու երկրներում թմրամիջոցների, հոգեմետ նյութերի և դրանց պրեկուրսորների ապօրինի շրջանառության դեպքերի և դրանց հակազդմանն ուղղված միջոցառումների վերաբերյալ: Պայմանավորվածություն ձեռք բերվեց այսուհետ էլ ավելի սերտորեն համագործակցել տեղեկատվության փոխանակման գործում:
Շնորհակալություն հայտնելով ջերմ ընդունելության համար, Մարկո Դոկմանովիչը պատրաստակամություն հայտնեց շարունակել համատեղ աշխատանքը՝ հանցավորության դեմ պայքարում Հայաստանի Հանրապետության ոստիկանության և Ավստրալիայի Դաշնային ոստիկանության հետ փոխհամագործակցության և փոխադարձ կապերի ամրապնդման նպատակով:
Հանդիպումն անցավ փոխըմբռնման ջերմ մթնոլորտում:
Այցի շրջանակներում հանդիպում տեղի ունեցավ նաև ՀՀ-ում Ինտերպոլի ԱԿԲ-ի պետ, ոստիկանության փոխգնդապետ Արա Ֆիդանյանի հետ: