Արմավիրի ոստիկանները գողության համար հետախուզվողի են հայտնաբերել. բացահայտվել են գաղտնի հափշտակության այլ դրվագներ

Մայիսի 24-ին, ժամը 21-ին ոստիկանության Արմավիրի մարզային վարչության և Արմավիրի բաժնի քրեական հետախույզները ձեռնարկած համատեղ օպերատիվ-հետախուզական միջոցառումների շնորհիվ, Նորապատ գյուղի գյուղմթերքի շուկայից բաժին են բերման ենթարկել 1987թ. ծնված, Արարատի մարզի Գոռավան գյուղի բնակիչ Արսեն Գ-ին, որը մայիսի 16-ից Շենգավիթի բաժնի կողմից հետախուզվում էր գողության մեղադրանքով:
Հետագա միջոցառումներով պարզվել է, որ նա մայիսին Նոր Հաճնի տներից մեկի բակից գյուղտեխնիկա և շինարարական գործիքներ է գողացել ու վաճառել, մեկ ուրիշի ավտոտնակից հափշտակել է 6 անվադող` անվահեցերով, գազի բալոն, պղնձե մալուխ, զոդման սարք, կենցաղային իրեր, որոնք դարձյալ վաճառել է: Օրերի տարբերությամբ Արսեն Գ-ն` օգտվելով Արագածոտնի մարզի Արուճ գյուղի տներից մեկի դարպասը բաց լինելու հանգամանքից, մուտք է գործել տարածք և աշխատանքային գործիքներ գողացել:
Նախապատրաստված նյութերը տարածքային կարգով ուղարկվել են ոստիկանության համպատասխան բաժիններին:
Արսեն Գ-ի հայտնաբերման մասին հայտնվել է հետախուզումը նախաձեռնողին:

***
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: