Ոստիկանները բացահայտել են հերթական գրպանահատությունը

Հուլիսի 22-ին, ժամը 11-ին, Մաշտոցի պողոտայում ոստիկանության Երևան քաղաքի վարչության ՊՊԾ գնդի 1-ին գումարտակի ծառայողներին է մոտեցել մի կին և հայտնել, որ երթուղային ավտոբուսի սրահում փորձել են գողանալ իր դրամապանակը: Կինը բացատրություն է տվել, որ ավտոբուսի սրահում երկու հոգի գողացել են իր դրամապանակը, որի մեջ եղել է 46 հազար դրամ, սակայն նրանցից մեկին նկատելուց հետո գողացված դրամապանակը, ամբողջ պարունակությամբ, վերադարձրել են:
Կենտրոնականի քրեական հետախույզների ձեռնարկած օպերատիվ-հետախուզական միջոցառումների շնորհիվ պարզվել է, որ գողությունը կատարել է Մանթաշյան փողոցի բնակիչ, 26-ամյա մի երիտասարդ:
Ոստիկանության Երևան քաղաքի վարչության քրեական հետախուզության բաժնի գրպանահատության դեմ պայքարի բաժանմունքի ծառայողները, իրացնելով ստացված օպերատիվ տվյալները, նշված գողությունը կատարելու կասկածանքով, հուլիսի 25-ին, ժամը 19-ին, Ֆրանսիայի հրապարակից բերման են ենթարկել երիտասարդին, որը տվել է խոստովանական բացատրություն:
Նախապատրաստվում են նյութեր: