Ոստիկանները մեկ օրում բացահայտեցին Դեմիրճյան փողոցում «Լեքսուսից» կատարված գողությունը (ՏԵՍԱՆՅՈՒԹ)

Հունիսի 4-ին՝ ժամը 21-ն անց 25-ի սահմաններում, ոստիկանության Երևան քաղաքի վարչության օպերատիվ կառավարման կենտրոնից ոստիկանության Արաբկիրի բաժին հաղորդում է ստացվել, որ մայրաքաղաքի Դեմիրճյան փողոցում կայանված մեքենաներից մեկից գողություն է կատարվել։ Անհայտ անձը կամ անձինք կոտրել էին «Լեքսուս» մակնիշի ավտոմեքենայի կողային ապակիներից մեկը և սրահից գաղտնի հափշտակել նոթբուք ու թանկարժեք խմիչք։ Հանցագործությունը թարմ հետքերով բացահայտելու նպատակով Արաբկիրի քրեական հետախույզներին միացան ոստիկանության Երևան քաղաքի վարչության քրեական հետախուզության բաժնի ծառայողները։ Համատեղ միջոցառումների արդյունքում անձնական ունեցվածքի գողության դեպքը բացահայտվեց կարճ ժամանակում։ Օպերատիվ միջոցառումների շնորհիվ՝ դեպքի հաջորդ օրը՝ հունիսի 5-ին, ոստիկանների տեսադաշտում հայտնվեց Ներքին Չարբախում ապրող 40-ամյա մի տղամարդ, որը նույն օրը հայտնաբերվեց և կասկածանքով բերման ենթարկվեց ոստիկանության Արաբկիրի բաժին։ Բերման ենթարկվածը խոստովանական բացատրություն է տվել։ Հետագա միջոցառումներով հայտնաբերվել է նաև գողացված համակարգիրչը, որն առգրավվել է՝ փորձաքննության ուղարկվելու համար։
Դեպքի հանգամանքները քննությամբ պարզվում են։