Քննարկվեցին համայնքային ոստիկանության ծառայողների համար կազմակերպված «Բանակցություններ վարելու և հաղորդակցվելու ունակությունները» թեմայով սեմինարների արդյունքները (ՏԵՍԱՆՅՈՒԹ)

Հունիսի 30-ին ոստիկանության Երևան քաղաքի վարչության պետ, ոստիկանության գնդապետ Աշոտ Կարապետյանն ընդունեց ԵԱՀԿ երևանյան գրասենյակի ռազմաքաղաքական ծրագրերի ղեկավար Լիլիան Շալառուի գլխավորած պատվիրակությանը, որի կազմում էր նաև ոստիկանության գծով միջազգային փորձագետ Դեյվիդ Այենսոնը:
Հանդիպմանը ներկա էին Երևան քաղաքի վարչության ենթակա ստորաբաժանումների համայնքային ոստիկանության ծառայողներ, որոնց համար մարտի 14-ից 22-ը և ապրիլի 4-ից 12-ը ԵԱՀԿ Երևանյան գրասենյակի կողմից կազմակերպվել էին «Բանակցություններ վարելու և հաղորդակցվելու ունակությունները» թեմայով սեմինարներ: Հանդիպման ընթացքում նշվեց, որ երկօրյա վեց սեմինարների ընթացքում փորձագետների կողմից համայնքային ոստիկանության 138 ծառայողների ներկայացվել են բանակցությունների, հաղորդակցության, հարաբերությունների և հասարակության մեջ վստահության մթնոլորտի ստեղծման հարցերի վերաբերյալ անհրաժեշտ գիտելիքներ և հմտություններ: Վերապատրաստման դասընթացների նյութը մշակվել էր միջազգային համայնքային ոստիկանության լավագույն փորձի ուսումնասիրման, ինչպես և Երևան քաղաքի համայնքային ոստիկանության ստորաբաժանումներ կատարած այցերի արդյունքում, որտեղ փորձագետները համայնքային ոստիկանների հետ խորհրդակցել են նրանց առօրյա գործունեության, հնգամյա աշխատանքային փորձի արդյունքում ձեռք բերված ունակությունների և աշխատանքի ընթացքում ծագող խնդիրների շուրջ:
Հանդիպման ավարտին Լիլիան Շալառուն դասընթացների մասնակիցներին շնորհեց հավաստագրեր: Նրանց հանձնվեց նաև փորձագետների կողմից գրասենյակի աջակցությամբ տպագրված հաղորդակցվելու և բանակցություններ վարելու ձեռնարկը: