Դպրոցականներն այցելել են ոստիկանության բաժիններ (ՏԵՍԱՆՅՈՒԹ)

Հոկտեմբերի 10-ին ոստիկանության ՔՀԳՎ 3-րդ վարչության նախաձեռնությամբ մեկնարկեց «Մեկ օր ոստիկան» միջոցառումը, որը նախատեսված է անցկացնել հանրապետության ավագ դպրոցների շրջանում:
Միջոցառման նպատակն է ամրապնդել ոստիկան-աշակերտ կապը, ձևավորել փոխվստահություն միմյանց նկատմամբ, ինչպես և հնարավորություն ընձեռնել դպրոցականներին այցելել ոստիկանության ստորաբաժանումներ, ծանոթանալ ոստիկանի առօրյային, աշխատանքային գործունեությանը:
Առաջին ստորաբաժանումները, ուր հյուրընկալեցին Մանուկ Աբեղյանի անվան և Հայ-չինական բարեկամության թիվ 103 դպրոցների սաներին, ոստիկանության Կենտրոնականի և Քանաքեռ-Զեյթունի բաժիններն էին:
Դպրոցականները եղան հերթապահ մասերում, ծանոթացան կապի միջոցներին, հերթապահների աշխատանքային գործունեությանը, մասնավորապես` քաղաքացիներից ստացվող ահազանգերի և հաղորդումների արձագանքման մեխանիզմներին, տեսան բաժինների զինանոցներում գտնվող հատուկ միջոցները: Նրանց հետաքրքրում էր ամեն ինչ` որ հատուկ միջոցն ինչպես են կրում, որ դեպքում կիրառում և այլն:
Անչափահասներն այցելեցին նաև տարածքային բաժինների մյուս ստորաբաժանումներ, ծանոթացան քրեական հետախույզների, համայնքային ոստիկանների գործառույթներին` ստանալով իրենց հետաքրքրող հարցերի պատասխանները:
Ոմանց հետաքրքրում էին արդեն ոստիկանության կրթահամալիր դիմելու կարգն ու քննությունները:
Տպավորություններն աննկարագրելի էին, հանդիպումը` հետաքրքիր և ճանաչողական: