Ավազակային հարձակումներ․ բոլոր հանցագործները վաղ թե ուշ հայտնաբերվում են (ՏԵՍԱՆՅՈՒԹ)

Ավազակային հարձակում։ Սա սեփականության դեմ ուղղված ծանր հանցագործություն է։ Հանցատեսակի դրսևորումները տարբեր են: Առավել հաճախ թիրախ են դառնում բանկեր, վարկային կազմակերպություններ, խանութներ, դեղատներ։
Հանցավոր հակումներ ունեցող անձինք քաջատեղյալ լինելով, որ բոլոր այս հաստատություններում կան տեսախցիկներ ու անվտանգության համակարգեր, միևնույն է` գնում են արկածախնդրության։
Այդպես էր եղել, օրինակ, հոկտեմբերի 27-ի կեսգիշերին։ Ազատության պողոտայի դեղատներից մեկն էր մտել մի տղամարդ, աշխատակցուհուն դանակով սպառնացել ու հափշտակել դրամարկղի գումարը։ Դեղատան տեսախցիկը ֆիքսել էր կատարվածը։ Ավազակություն կատարողին թվում էր, թե տեսախցիկից թաքնվելով՝ կխուսափի քրեական պատասխանատվությունից, սակայն միայն թվում էր։ Կասկածյալին ոստիկանները օրեր անց հայտնաբերեցին ու բերման ենթարկեցին ոստիկանություն։
Վերջերս մետրոյի «Գործարանային» կայարանի տարածքում ինչ-որ մեկը մետրոյի կայարանի հարակից ավտոկայանատեղիում մի տղամարդու էր հարվածել, հափշտակել գումար, բջջային հեռախոս և փախել։
Թեև մոտակայքում չեն եղել տեսահսկող սարքեր, բայց եղել են ոստիկաններ։ Ոստիկանության ծառայողներն անմիջապես հետապնդել և բռնել են կասկածյալին:
Գրեթե բոլոր հաստատություններում կան տեսախցիկներ, որոնք ֆիքսում են ամեն շարժ։ Սա, իհարկե, որոշ չափով օգնում է իրավապահներին՝ բացահայտելու հանցագործությունը, եթե անգամ տեսագրությունում չի երևում հանցագործությունը կատարողի դեմքը։
Բացի այդ, ոստիկանությունն իրականացնում է հասարակական կարգի պահպանության շուրջօրյա ծառայություն։ Մեկ անգամ չէ, որ գիշերային շրջայցի ժամանակ պարեկայինները ավազակություն կատարողին բռնել են հանցագործության վայրը լքելիս։ Օբյեկտների պահպանություն է իրականացնում նաև ոստիկանության պետական պահպանության գլխավոր վարչությունը։ Ցանկացած ոտնձգության դեպքում ստորաբաժանման արագ արձագանքման խմբերը հաշված րոպեների ընթացքում լինում են տեղում։
Բացահայտումներ լինում են նաև այլ՝ միայն քրեական հետախույզներին հայտնի միջոցների կիրառմամբ, ինչի մասին, բնականաբար, կլռենք։
Ի դեպ, խոսելով ավազակության մասին՝ հարկ է նաև նշել, որ քրեական օրենսգրքի համանուն հոդվածը նախատեսում է պատիժ մինչև 15 տարի ազատազրկում։
Երկար կարելի է թվել ոստիկանության գործողությունները այս հանցատեսակի բացահայտման ուղղությամբ։ Ընդհանրապես, բոլոր հանցատեսակների պարագայում էլ ոստիկանության գերխնդիրը դրանց կանխումն է, ինչին հասնելու ուղիղ ճանապարհը քարոզչությունն է, բացատրական աշխատանքը:
Իսկ բոլոր նրանց, ովքեր ընտրել են անօրինական ճանապարհներ, հիշեցնենք, որ չկան չբացահայտվող հանցագործություններ, և բոլոր հանցագործները վաղ թե ուշ հայտնաբերվում են։