Ոստիկանները բերման են ենթարկել հետախուզվողի. բացահայտելով ավազակության դեպք (ՏԵՍԱՆՅՈՒԹ)

Ոստիկանության քրեական հետախուզության գլխավոր վարչության ծառայողները, իրացնելով ստացված օպերատիվ տեղեկությունները, հուլիսի երկուսին Երևանի Ազատամարտիկների և Դավիթ Բեկի փողոցների խաչմերուկից ոստիկանություն բերման ենթարկեցին ավազակային հարձակման կասկածանքով և զորամասը կամ ծառայության վայրն ինքնակամ թողնելու մեղադրանքով հետախուզվող 20-ամյա մի քաղաքացու:
Բերման ենթարկվածը խոստովանեց, որ հուլիսի երկուսին Շենգավիթի բենզալցակայաններից մեկում զենքի սպառնալիքով հափշտակել է 62․000 դրամ ու բջջային հեռախոս:
Նրա խուզարկությամբ հայտնաբերվեց բջջային հեռախոսն ու հափշտակած գումարի մի մասը:
Ձեռնարկվում են միջոցառումներ հանցագործության գործիք ատրճանակը հայտնաբերելու ուղղությամբ:
Պարզվել է նաև, որ հունիսին հետախուզվողը Կապանի շենքերից մեկի կտուրից պարանով իջել է բնակարաններից մեկն ու գողացել հեռուստացույց, ձեռքի ժամացույցներ, հուշամեդալ և այլ իրեր:
Ըստ բերման ենթարկվածի՝ գողության պահին հեռուստացույցը վնասվել է, ինչի պատճառով այն գցել է քաղաքի մոտակա ձորը, իսկ ժամացույցները վաճառել է Երևանի տոնավաճառներից մեկում:
Նա կալանավորված է:
Նախաքննությունը շարունակվում է։