Ոստիկանները բացահայտեցին Նոր Նորքում կատարված բնակարանային գողությունը. կա 4 ձերբակալված

Հունիսի 18-ին, ժամը 22.40-ին, ոստիկանության Նոր Նորքի բաժին է ահազանգել մի կին և հայտնել, որ տնից գողություն է կատարվել:
Մեկնած օպերատիվ խումբը պարզել է, որ հունիսի 18-ի ժամը 21.00-ից 22.30-ն ընկած ժամանակահատվածում, հարմարեցված բանալիով մուտքի դուռը բացելով, բնակարանից գողացել են գումար, ոսկյա թևնոց, բիժուտերիա:
Ոստիկանության քրեական հետախուզության գլխավոր վարչության, Նոր Նորքի բաժնի, Շիրակի մարզային վարչության և Մուշի բաժնի ծառայողները, գողությունը կատարելու կասկածանքով, հունիսի 18-ին, ժամը 23.43-ին, Մոսկովյան փողոցի և Բաղրամյան պողոտայի խաչմերուկից բերման են ենթարկել Գյումրիի բնակիչ 26-ամյա երիտասարդի, իսկ ժամը 23.55-ին Ռուբինյանց փողոցի գազալցակայանից «ԲՄՎ» մակնիշի ավտոմեքենայով հանդերձ բերման են ենթարկել Վանաձորի բնակիչներ, 24-27 տարեկան երեք երիտասարդի, որոնցից երկուսը՝ համաներմամբ ազատ արձակված:
Բերման ենթարկվածներից մեկի մոտ հայտնաբերվել է կնոջ բնակարանից գողացված ոսկյա թևնոցը:
Ձեռնարկվում են միջոցառումներ գողոնի մյուս մասը հայտնաբերելու ուղղությամբ:
Բերման ենթարկվածները ձերբակալվել են:
Վնասի չափը պարզվում է:
Կատարվում է նախաքննություն:

***
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: