Համագործակցությունը շարունակվում է. սարքավորումներ ՀՀ ոստիկանության կրթահամալիրին

2012 թ. փետրվարի 21-ին Հայաստանում ԱՄՆ դեսպան Ջոն Հեֆերնը այցելեց ՀՀ ոստիկանության կրթահամալիր, որտեղ հանդիպեց կրթահամալիրի պետ, գեներալ-լեյտենանտ Հովհաննես Վարյանին:
Հանդիպման ընթացքում Ջոն Հեֆերնը ԱՄՆ Կառավարության անունից կրթահամալիրին նվիրաբերեց մոտ 50.000 ԱՄՆ դոլար արժողությամբ համակարգչային սարքավորումներ:
Սարքավորումները նախատեսված են ոստիկանության կրթահամալիրում կրթական և ուսուցողական ռեսուրսների բարելավման համար:
Այս նվիրատվությունը մաս է կազմում ԱՄՆ Կառավարության կողմից իրավապահ մարմիններին ցուցաբերվող աջակցության ծրագրի, որն ուղղված է Հայաստանի իրավապահ կառույցների կարողությունների հզորացմանը հանցավորության դեմ պայքարի և արդարադատության ասպարեզում:
Նախկինում համակարգչային տեխնիկա է նվիրաբերվել ՀՀ ոստիկանության անօրինական միգրացիայի, մարդկանց թրաֆիքինգի, թմրամիջոցների և կիբեր հանցագործությունների դեմ պայքարի բաժիններին: Ծրագրի շրջանակներում նաև անցկացվել են վերապատրաստման և կարողությունների զարգացման դասընթացներ` անդրազգային հանցավորության դեմ պայքարի և կանխարգելման նպատակով:
ԱՄՆ կառավարությունը Հայաստանում իրավապահ մարմիններին և արդարադատության համակարգին աջակցելու նպատակով տարեկան տրամադրում է մոտ 3 միլիոն ԱՄՆ դոլար: