Մուրացիկ և թափառաշրջիկ երեխաների խնդիրներով մտահոգ (ՏԵՍԱՆՅՈՒԹ)

Հունիսի 21-ին ոստիկանությունում տեղի ունեցավ մուրացիկ և թափառաշրջիկ երեխաների հայտնաբերման, նրանց հետ կապված խնդիրների լուծման, միասնական աշխատանքերի կազմակերպման նպատակով ստեղծված միջգերատեսչական աշխատանքային խմբի հերթական նիստը:
Նիստին մասնակցում էին ոստիկանության մասնագիտացված ստորաբաժանումների ծառայողներ, Հայաստանում ՄԱԿ-ի մանկական հիմնադրամի, «Հայ օգնության ֆոնդի երեխաների աջակցության կենտրոնի», Մարդու իրավունքների պաշտպանի գրասենյակի, պետական տարբեր շահագրգիռ կառույցների, այդ թվում` առողջապահության նախարարության, Երևանի քաղաքապետարանի և մարզպետարանների ներկայացուցիչներ:
Ողջունելով ներկաներին` ոստիկանության ՔՀԳՎ 3-րդ վարչության պետ Նելլի Դուրյանը ներկայացրեց քննարկվելիք հարցերը, որոնք վերաբերում էին ինչպես տարվա ընթացքում մուրացիկ և թափառաշրջիկ անչափահասների ու նրանց ընտանիքների հետ տարված աշխատանքներին, այնպես էլ միջգերատեսչական համագործակցությանը:
Վարչության պետը նշեց, որ չնայած ծավալած աշխատանքներին` խնդիրը պահանջում է ներդնել բոլոր շահագրգիռ կառույցների ջանքերը, որպեսզի հանրապետությունում նվազի մուրացկանությամբ և թափառաշրջիկությամբ զբաղվող անչափահասների թիվը: Նա առաջարկեց հակասոցիալական վարքագիծ դրսևորած, սոցիալապես անապահով ընտանիքների անչափահաս երեխաների զբաղվածության հարցը ամռան ամիսներին լուծելու համար մարզպետարանների աջակցությամբ նրանց տրամադրել ճամբարի ուղեգրեր:
Ոստիկանության Երևան քաղաքի վարչության անչափահասների գործերով և ընտանիքում բռնության կանխարգելման բաժանմունքի պետ Տիգրան Խաչատուրյանը խոսեց նման երեխաների շրջանում իրականացվող կանխարգելիչ միջոցառումների, նաև տարածքային սոցիալական ծառայությունների հետ համագործակցության մասին:
Ներկայացվեցին մուրացիկ և թափառաշրջիկ երեխաների հայտնաբերման, նրանց առողջական վիճակի, խնամքն ու դաստիարակությունը կազմակերպելու, ինչպես և տեղական ինքնակառավարման մարմիններում գործող խնամակալության և հոգաբարձության մարմինների հետ փոխգործակցությանը վերաբերող այլ հարցեր ևս:
Առաջարկներով հանդես եկան աշխատանքային խմբի անդամները:
Քննարկումների արդյունքում կարևորվեց առկա խնդիրների լուծման ուղղությամբ համատեղ աշխատանքների իրականացումը: