Ոստիկանները պայքարում են գրպանահատության դեմ. երեք բացահայտում

Հուլիսի 30-ին, ժամը 10-ին, ոստիկանություն է զանգահարել 73-ամյա մի կին և հայտնել, որ մոտ կես ժամ առաջ թիվ 2 երթուղու միկրոավտոբուսի սրահում ամուսնու գրպանից գողացել են դրամապանակը, որի մեջ եղել է 20 հազար դրամ, վարորդական իրավունքի վկայականը և մեքենայի տեխնիկական զննման կտրոնը:
Քանաքեռ-Զեյթունի քրեական հետախույզների ձեռնարկած միջոցառումների շնորհիվ պարզվել է, որ գողությունը կատարել է Դրոյի փողոցի բնակիչ, 62-ամյա մի կին: Բացատրական աշխատանքների արդյունքում նա ներկայացել է բաժին, տվել խոստովանական բացատրություն և ներկայացրել գողոնի մի մասը:
Նախապատրաստվում են նյութեր:
Հուլիսի 30-ին, ժամը 20.40-ին, ոստիկանության Երևան քաղաքի վարչության գրպանահատության դեմ պայքարի բաժանմունքի ծառայողները Կոմիտասի պողոտայից, գողություն կատարելու կասկածանքով, ոստիկանության Արաբկիրի բաժին բերման են ենթարկել Շահումյանի բնակիչ, 24-ամյա մի երիտասարդի:
Պարզվել է, որ րոպեներ առաջ թիվ 47 երթուղու ավտոբուսի սրահում 66-ամյա մի կնոջ պայուսակից նա գողացել է դրամապանակը, որի մեջ եղել է երեք հազար դրամ, հնդկական 200 ռուփի և բանկային քարտ:
Գողոնը մասամբ հայտնաբերվել է:
Նախապատրաստվում են նյութեր:
Նույն օրը, ժամը 20.15-ին, 35-ամյա մի կին ոստիկանության Արաբկիրի բաժնում հաղորդում է տվել, որ մոտ կես ժամ առաջ թիվ 259 երթուղու ավտոբուսի սրահում իր պայուսակից գողացել են դրամապանակը, որի մեջ եղել է 18 հազար դրամ, բանկային, ապահովագրական ընկերության, զեղչի և կուտակային քարտեր:
Գրպանահատության դեմ պայքարի բաժանմունքի ծառայողներն, իրացնելով օպերատիվ տվյալները, ժամը 20.20-ին, գողություն կատարելու կասկածանքով, բերման են ենթարկել Շիրակի փողոցի բնակիչ, 64-ամյա մի տղամարդու, որը տվել է խոստովանական բացատրություն:
Գողոնը հայտնաբերվել է:
Նախապատրաստվում են նյութեր: