Ապարանի քրեական հետախույզները բացահայտեցին ավազակությունը

Մայիսի 20-ին, ժամը 00.15-ին, ոստիկանության Ապարանի բաժին մի տղամարդուց ահազանգ է ստացվել, որ մայիսի 19-ին, ժամը 23.00-ի սահմաններում, Երևան քաղաքի 3-րդ մասից ուղևոր է տեղափոխել Արագածոտնի մարզի Քուչակ գյուղ, որտեղ վերջինս դանակի սպառնալիքով իրենից հափշտակել է «Քսյաումի» տեսակի բջջային հեռախոս, ձեռքի ժամացույց և մոտ 20.000 դրամ ու դիմել փախուստի:
Վնասի չափը պարզվում է:
Ոստիկանության Ապարանի բաժնի ծառայողների ձեռնարկած օպերատիվ-հետախուզական միջոցառումների շնորհիվ նույն օրը, ժամը 02.20-ին, Քուչակ գյուղից բերման է ենթարկվել նույն գյուղի 28-ամյա մի բնակիչ: Նրա մոտից խուզարկությամբ հայտնաբերվել է բջջային հեռախոսը, 14.650 դրամ, իսկ տնից հայտնաբերվել և վերցվել է հանցագործության գործիք դանակը:
Նա ներկայացվել է ՀՀ ՔԿ Արագածոտնի մարզային քննչական վարչություն և ձերբակալվել:
Ձեռնարկվում են միջոցառումներ ձեռքի ժամացույցը հայտնաբերելու ուղղությամբ:
Կատարվում է նախաքննություն:

***
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: