«Փոխգործակցություն-2012» համատեղ զորավարժություններ

Սեպտեմբերի 19-ին ՀՀ պաշտպանության նախարարության «Մարշալ Բաղրամյան» զորավարժարանում տեղի ունեցան Հավաքական անվտանգության մասին պայմանագրի կազմակերպության արագ արձագանքման հավաքական ուժերի  «Փոխգործակցություն-2012» համատեղ զորավարժությունները: Ներկա էին ՀՀ նախագահ Սերժ Սարգսյանը, Ազգային անվտանգության խորհրդի քարտուղար Արթուր Բաղդասարյանը, պաշտպանության նախարար Սեյրան Օհանյանը, ոստիկանության պետ Վլադիմիր Գասպարյանը, ազգային անվտանգության ծառայության տնօրեն Գորիկ Հակոբյանը, արտակարգ իրավիճակների նախարար Արմեն Երիցյանը, Հայաստանի և ՀԱՊԿ անդամ պետությունների համապատասխան գերատեսչությունների այլ բարձրաստիճան պաշտոնյաներ: Արագ արձագանքման ստորաբաժանումները ցուցադրեցին իրենց մարտական պատրաստականությունն ու հմտությունները, բարդ պայմաններում փոխգործակցելու կարողությունը, մարտավարական ունակությունները: Առաջադրված խնդիրները լիարժեք իրականացրեց նաև ՀՀ ոստիկանության հատուկ նշանակության ստորաբաժանումը: Զորավարժությունների ավարտին աչքի ընկած մասնակիցներն արժանացան պարգևների: Արագ արձագանքման ստորաբաժանումների մի շարք մարտիկների, այդ թվում և ՀՀ ոստիկանության ծառայողների, պարգևներ հանձնեց նաև ոստիկանության պետ, գեներալ-լեյտենանտ Վլադիմիր Գասպարյանը: «Փոխգործակցություն-2012» զորավարժությունները եզրափակվեցին պատվո պահակախմբի ցուցադրական ելույթով: