Միջազգային փորձագետը ոստիկանության բարեփոխումներին նվիրված սեմինար-քննարկում անցկացրեց (ՏԵՍԱՆՅՈՒԹ)

Ոստիկանության և ԵԱՀԿ երեւանյան գրասենյակի համագործակցության շրջանակներում` հունիսի 13-ին Միացյալ Թագավորությունից ոստիկանության գծով միջազգային փորձագետ Դեյվիդ Այենսոնը ոստիկանությունում անցկացրեց համակարգի բարեփոխումներին նվիրված սեմինար-քննարկում:
Սեմինարի թեման ԵԱՀԿ երևանյան գրասենյակի աջակցությամբ և ՀՀ ոստիկանության հանձնառությամբ մշակված հասարակական կարգի պահպանության բարելավմանն ուղղված «Կարիքների գնահատումը» ձեռնարկի 44 առաջարկություններն էին:
Դեյվիդ Այենսոնն անդրադառնալով ոստիկանության բարեփոխումներին, նշեց, որ առանձին առաջարկությունների ուղղությամբ վերջին շրջանում դրական փոփոխություններն ակնհայտ են։ Ոստիկանությունը մշակել է ուղեցույցներ, ծառայողները մասնակցել են վերապատրաստման դասընթացների, բարելավվել են աշխատանքային պայմանները։ Սակայն որոշ ոլորտներ բարելավման կարիք ունեն, ինչն էլ երբեմն ոստիկանության քննադատության առիթ է տալիս:
Ոստիկանության պետի տեղակալ Սամվել Հովհաննիսյանն անդրադառնալով Դեյվիդ Այենսոնի դիտարկումներին` նշեց, որ նվազագույնի են հասել քաղաքացիների բողոքները զանգվածային միջոցառումների ժամանակ ոստիկանության ծառայողների գործողությունների վերաբերյալ, իսկ առաջիկայում ավելի շոշափելի բարեփոխումներ են սպասվում հասարակական կարգի պահպանությանը ներգրավված ծառայողների իրավագիտակցության բարձրացման և ծառայության տեխնիկական հագեցվածության ոլորտում:
Հասարակական կարգի ապահովման վարչության պետ Աղասի Կիրակոսյանը տեղեկացրեց, որ «Կարիքների գնահատումը» ձեռնարկում ամփոփված առաջարկությունները քննարկվել են, բոլոր կետերով դիտարկումներ են ներկայացվել ոստիկանության շտաբ: