Միջոցառում՝ նվիրված հայ ժողովրդի պանծալի հաղթանակներին և հերոսներին

Երևանի Քանաքեռ-Զեյթունի ոստիկանության վետերանների խորհրդի և Միսաք Մանուշյանի անվան թիվ 48 հիմնական դպրոցի կազմակերպած համատեղ միջոցառումը նվիրված էր հայ ժողովրդի տարած պանծալի հաղթանակներին և 2016 թ. ապրիլյան քառօրյա պատերազմում ընկած հերոս զինվորների հիշատակին:
Միջոցառմանը մասնակցում էին Երևանի քաղաքապետարանի հանրակրթության վարչության գլխավոր մասնագետ Նաիրա Հարությունյանը, ոստիկանության Երևան քաղաքի վարչության վետերանների խորհրդի նախագահ Սպարտակ Ամիրյանը, Քանաքեռ-Զեյթունի վետերանների խորհրդի նախագահ Կիմ Առաքելյանը, մեծանուն բանաստեղծ Համո Սահյանի որդին՝ ոստիկանության վետերան Նաիրի Սահյանը, մանկավարժներ, ծնողներ, աշակերտներ և հյուրեր:
Դպրոցի տնօրեն Ժասմենա Արիստակեսյանը միջոցառման բացման խոսքում բարձր գնահատեց ոստիկանության վետերանների խորհրդի և դպրոցի մանկավարժական կոլեկտիվի համագործակցությունը՝ երեխաների ռազմահայրենասիրական դաստիարակության գործում, և համոզմունք հայտնեց, որ երեխաների և ավագ սերնդի համագործակցությունն ու բարեկամությունը լինելու է շարունակական:
Միջոցառման մասնակիցները ծանոթացան դպրոցի առաջին հարկի սրահում տեղադրված, ոստիկանության վետերան, ժողովրդական նկարիչ Միսակ Սաֆարյանի նկարների և քանդակների ցուցահանդեսներին, այնուհետև ականատես եղան դպրոցի սաների անձնական ստեղծագործություններին՝ նվիրված ապրիլյան քառօրյա պատերազմի մասնակից մեր զինվորներին:
Միջոցառումը շարունակվեց դպրոցի հանդիսությունների դահլիճում՝ ասմունքի միջոցով պատմական էքսկուրս կատարվեց Ավարայր, Սարդարապատ, Հայրենական մեծ պատերազմի տարիները, Արցախյան և ապրիլյան հերոսական դրվագները՝ արտացոլելով թշնամու դեմ տարած հայ ժողովրդի զավակների փայլուն հաղթանակները:
Հնչեցին ելույթներ, գնահատանքի և շնորհակալության խոսքերով հանդես եկան Նաիրա Հարությունյանը, Սպարտակ Ամիրյանը, Կիմ Առաքելյանը, Քանաքեռ-Զեյթունի ոստիկանության վերետանների խորհրդի անդամ Միսակ Սաֆարյանը, ինչպես նաև հրավիրված ծնողները:
Վերջում հյուրերը այցելեցին դպրոցում տեղակայված Միսաք Մանուշյանի թանգարան:
Դպրոցի տնօրինության հետ պայմանավորվածություն ձեռք բերվեց Քանաքեռ-Զեյթունի ոստիկանության վետերանների խորհրդի անդամ, նկարիչ Միսակ Սաֆարյանի կողմից նկարչության անվճար դասընթացներ անցկացնել դպրոցի շնորհալի աշակերտների հետ, որը սիրով ընդունվեց: