Մարզերում բնակիչները կամավոր զենք-զինամթերք են ոստիկաններին հանձնել (ՏԵՍԱՆՅՈՒԹ)

Հրազենային վնասվածքների, մահացու դեպքերի զգալի մասն ապօրինի պահվող զենք-զինամթերքի գործածության հետևանքով են լինում: Ուստի այդ հանցագործությունների կանխարգելման տեսանկյունից առանցքային նշանակություն ունեն բնակչության մոտ ապօրինի պահվող զենք-զինամթերքի կամավոր հանձնմանն ու հայտնաբերմանն ուղղված միջոցառումները:
Սեպտեմբերի 26-ին, ժամը 11-ի սահմաններում, ոստիկանության Եղեգնաձորի բաժնի ծառայողների բացատրական աշխատանքների շնորհիվ Անդրանիկի փողոցի մի բնակիչ կամավոր հանձնել է ինքնաշեն ատրճանակ՝ պահեստատուփով, 3 ինքնաշեն նռնակ և տարբեր տրամաչափի 80 փամփուշտ:
Նույն օր քաղաքացիները կամավոր զենք-զինամթերք են հանձնել նաև Կոտայքի մարզում:
Ոստիկանության Բյուրեղավանի բաժանմունքի ծառայողների բացատրական աշխատանքների շնորհիվ, ժամը 20-ի սահմաններում, Բյուրեղավանի Կոտայքի փողոցի մի բնակիչ կամավոր հանձնել է նռնակ` պայթուցիչով և ինքնաձիգի 5,45 մմ տ/չ 63 փամփուշտ:
Օպերատիվ-կանխարգելիչ միջոցառման շրջանակներում, ոստիկանության Նաիրի բաժնի ծառայողների անցկացված բացատրական աշխատանքների շնորհիվ, ժամը 20.30-ի սահմաններում, բաժին է ներկայացել Եղվարդի Արայի 1-ին թաղամասի մի բնակչուհի և կամավոր հանձնել «Ֆ1» տեսակի նռնակ` առանց պայթուցիչի և «KC» որսորդական ողորկափող հրացան:
Եվս մեկ որսորդական հրացան էլ, բայց արդեն «Իժ» տեսակի, սեպտեմբերի 27-ին ոստիկանների բացատրական աշխատանքի շնորհիվ Վայոց ձորի մարզի մի բնակիչ է կամավոր ոստիկանության Վայքի բաժին բերել:
Նշանակվել են դատաձգաբանական փորձաքննություններ:
Կրկին հիշեցնում ենք. քրեական օրենսգրքի 235-րդ հոդվածի 5-րդ մասի համաձայն` ապօրինի զենք-զինամթերքը կամովին հանձնած անձն ազատվում է քրեական պատասխանատվությունից: