Համագործակցում են ոստիկանական բարձրագույն ուսումնական հաստատությունները (ՏԵՍԱՆՅՈՒԹ)

Հունիսի 27-ից 28-ը ՀՀ ոստիկանության կրթահամալիրում տեղի ունեցավ «Ոստիկանության տեղը եւ դերը պետական կառավարման համակարգում» թեմայով միջազգային գիտագործնական համաժողովը, որին մասնակցում էին Ռուսաստանի Դաշնության եւ Բելառուսի Հանրապետության ոստիկանական բարձրագույն ուսումնական հաստատությունների ներկայացուցիչներ։
Մինչ համաժողովի սկսվելը, հյուրերը ծաղիկներ դրեցին Արցախյան ազատամարտում եւ ծառայողական պարտականությունները կատարելիս զոհված ոստիկանների հուշակոթողին։
Մեզ հետ զրույցում կարեւորելով հայ գործընկերների հետ համագործակցությունը՝ Ռուսաստանի ներքին գործերի նախարարության կառավարման ակադեմիայի պետի առաջին տեղակալ, ոստիկանության գեներալ-մայոր Ալեքսանդր Պարադնիկովն ընդգծեց երկու երկրների ոստիկանական կրթօջախների փորձի փոխանակումը եւ փոխգործակցության ամրապնդումը։
Հայ գործընկերների հետ համագործակցությունը բարձր գնահատեց նաեւ Վոլգոգրադի ակադեմիայի պետի առաջին տեղակալ Աննա Տիմոֆեեւնան՝ նշելով, որ իրենց ակադեմիայի մեծ թվով հայաստանցի շրջանավարտներ իրենց մասնագիտական պարտքն են կատարել եւ կատարում Հայաստանի ոստիկանության շարքերում։
Համաժողովի աշխատանքին անցնելուց առաջ ոստիկանության կրթահամալիրի պետ, ոստիկանության գեներալ-լեյտենանտ Հովհաննես Վարյանը ընթերցեց ոստիկանության պետ Վալերիյ Օսիպյանի խոսքը՝ ուղղված համաժողովի մասնակիցներին։
Համաժողովը վարում էր կրթահամալիրի պետի առաջին տեղակալ Տիգրան Եսայանը։
Պետական կառավարման համակարգում ոստիկանության դերակատարման, ինչպես նաեւ ոստիկանական կառույցների համագործակցության շուրջ ելույթ ունեցան ՌԴ ՆԳՆ համառուսաստանյան գիտահետազոտական ինստիտուտի պետ, ոստիկանության գեներալ-լեյտենանտ Վալերի Կոժոկարը, Բելառուսի Հանրապետության ՆԳՆ Մոգիլյովի ինստիտուտի պետ, միլիցիայի գեներալ-մայոր Վալերի Պոլիշչուկը, ՌԴ ՆԳՆ Կրասնոդարի համալսարանի պետի առաջին տեղակալ, ոստիկանության գեներալ-մայոր Օլեգ Բուլգակովը, ՌԴ ՆԳՆ կառավարման ակադեմիայի պետի առաջին տեղակալ, ոստիկանության գեներալ-մայոր Ալեքսանդր Պարադնիկովը եւ այլք։