Կողոպտչի և տուժող կնոջ հերթական հանդիպման տրամաբանական վախճանը

Հուլիսի 17-ին ոստիկանության Արաբկիրի բաժնում հաղորդում էր ստացվել անհայտ անձի կողմից Ռուզաննա Ս.-ի պարանոցի ոսկյա շղթան բացահայտ հափշտակելու մասին:
Հուլիսի 29-ին, ժամը 15.30-ին, ոստիկանության Երևան քաղաքի վարչության օպերատիվ կառավարման կենտրոն է զանգահարել Ռուզաննա Ս.-ն և հայտնել, որ Հ. Քոչարի և Փափազյան փողոցների խաչմերուկում ինքը տեսել է իր ոսկյա շղթան գողացողին և հետապնդում է նրան:
Ոստիկանության Երևան քաղաքի վարչության ՊՊԾ գնդի 2-րդ գումարտակի 1-ին վաշտի և Արաբկիրի բաժնի քրեական հետախուզության բաժանմունքի ծառայողների ձեռնարկած միջոցառումների արդյունքում` Հ. Քոչարի փողոցի թիվ 21 հասցեի մոտից բերման է ենթարկվել 1989 թ. ծնված Երեմ Հ.-ն, որին այլ բան չէր մնում, քան խոստովանել, որ հուլիսի 17-ին ինքն է հափշտակել Ռուզաննա Ս.-ի պարանոցի ոսկյա շղթան:
Կատարվում է քննություն: