ԵԱՀԿ երևանյան գրասենյակի աջակցությամբ ոստիկանության կրթահամալիրի գրադարանային ֆոնդը համալրվեց նոր մասնագիտական գրականությամբ

Հոկտեմբերի 31-ից նոյեմբերի 3-ը Ծաղկաձորում անցկացված «Ժողովրդավարական ոստիկանություն» թեմայով դասընթացի 28 մասնակիցներին ավարտական հավաստագրեր հանձնելու և ՀՀ ոստիկանության կրթահամալիրին հերթական անգամ գրքեր նվիրելու նպատակով՝ նոյեմբերի 25-ին կրթահամալիր էր այցելել ԵԱՀԿ երևանյան գրասենյակի ղեկավար, դեսպան Արգո Ավակովի գլխավորած պատվիրակությունը։
Ոստիկանական կրթական բարեփոխումների շարունակական աջակցության տրամադրման շրջանակում ԵԱՀԿ երևանյան գրասենյակը ՀՀ ոստիկանության կրթահամալիրին նվիրեց հայերեն, ռուսերեն և անգլերեն լեզուներով 83 անուն 190 օրինակ գիրք։
Գրքերի ցանկում ներառված են իրավական ոլորտի հրատարակություններ. եվրոպական միջազգային իրավունք, քրեական դատավարություն, պետության և իրավունքի տեսություն, օպերատիվ հետախուզական գործունեություն, կրիմինալիստիկա, քրեաբանություն, ինչպես նաև մարդու իրավունքներին առնչվող միջազգային փաստաթղթերի վերաբերյալ գրականություն։
ՀՀ ոստիկանության կրթահամալիրի պետ, ոստիկանության գեներալ-լեյտենանտ Հովհաննես Վարյանն իր երախտագիտությունն հայտնեց դեսպան Արգո Ավակովին` շեշտելով, որ ԵԱՀԿ երևանյան գրասենյակը մշտապես աջակցում է կրթահամալիրին՝ իր օժանդակությունը տրամադրելով բոլոր նախաձեռնություններին։
Դեսպան Արգո Ավակովն իր ավարտական խոսքում նշեց, որ ԵԱՀԿ երևանյան գրասենյակը ապագայում ևս շարունակելու է կրթահամալիրին գրքեր նվիրելու նախաձեռնությունը։